Esquerda Unida denuncia a práctica racista e xenófoba posta en práctica polo Goberno, esta vez mediante a publicación dunha resolución no Boletín Oficial do Estado (BOE) pola que licita, por un total de 11.880.000 euros, voos de deportación de inmigrantes en situación irregular aos seus países de orixe ou procedencia para 2016 e 2017.
Xabier Ron, membro da dirección de Esquerda Unida e deputado de AGE, esixirá de novo ao Parlamento, por medio do grupo Alternativa Galega de Esquerda (AGE), a inmediata cancelación deste tipo de accións por parte do Ministerio do Interior, “actuacións que son a demostración dunha total falla de sensibilidade e humanidade e que se están a realizar co beneplácito da Xunta de Galicia”.
Segundo sinala Ron, “foi en plena véspera da noite de ilusión que supoñen para as crianzas os reis magos de Oriente cando o Ministerio do Interior publicaba no BOE o exercicio de realismo sucio consistente na licitación do contrato para realizar os voos de deportacións masivas e ilegais”.
Tal e como engade Xabier Ron, “as persoas inmigrantes depórtanse sen atender ás condicións da irregularidade administrativa e sen nin tan sequera informar dos seus dereitos procesais”. Neste senso, Ron lembra que “o Ministerio do Interior pretende continuar a atentar contra os dereitos humanos e vulnerar as normas de dereito internacional con cartos públicos. Exactamente un total de 11,8 millóns que servirán para alimentar un negocio baseado en prácticas ilegais e ilexítimas”, indica.
“O artigo sétimo do Estatuto de Roma da Corte Penal Internacional, que considera como crime de lesa humanidade a deportación ou traslado forzoso de poboación; o artigo 19 da Carta de Dereitos Fundamentais da UE, que prohibe as expulsións colectivas; e o protocolo cuarto do Convenio Europeo dos dereitos Humanos, que sinala no seu artigo 4 a prohibición das expulsións colectivas de estranxeiros, son algunhas das normas internacionais ás que atenta esta práctica”, explica o deputado.
No último bienio, as compañías Air Europa e Swift Air, do Grupo Globalia, foron as que participaron nunha práctica que é unha clara violación dos dereitos humanos, polo que dende Esquerda Unida insistimos na urxencia de acabar con estas operacións humillantes de deportación masiva e insistimos en que se garantan, dunha vez por todas, os dereitos das persoas migrantes.