O Grupo Municipal de Esquerda Unida quere expresar o seu apoio as demandas das e dos traballadores de Urbaser en Ferrol diante das reiterados incumprimentos do convenio colectivo. Incumprimentos e prepotencia caracterizan o mal quefacer da empresa en relación coa plantilla.
As reclamacións das e dos traballadores fan fincapé nas anomalías que supoñen a vulneración de artigos do convenio. Así a empresa vulnera o artigo 8 do convenio colectivo, cando nomea un capataz que non figura na relación de traballadores na empresa en Ferrol, constando no devandito artigo que a promoción para as prazas de superior categoría farase entre o persoal en activo no centro de traballo ao que se lle aplica este convenio, a saber, a plantilla adscrita ao servizo de limpeza pública, recollida e transporte de RSU do concello de Ferrol. O capataz nomeado pola empresa está adscrito a salvamento marítimo, nunha flagrante vulneración do convenio colectivo.
Outra das actuacións inaceptables forzadas pola empresa é o manter fóra da cidade os máis dos días á traballadora que leva a delegación de riscos laborais, que só vén moi de cando en cando por Ferrol. Coa moi grave problemática que arrastra o noso país en materia de sinistralidade laboral esta actuación semella inaceptable.
O mal quefacer da empresa tenta non deixar rastro no papel e desta maneira cando acceden a manter unha reunión coa representación sindical e impoñen que non haxa acta.
Incumprimentos do convenio e malas prácticas ( caso de utilizar as instalacións de Ferrol para proceder a reparación de camións doutras localidades; ou a non garantía de confidencialidade nas nóminas, a causa de seren entregadas até hai pouco abertas ou agora sendo ensobradas sen garantirse a referida confidencialidade ) conforman un penoso ronsel que denigra todos os días á empresa, que vén protagonizando un continuum de ataques aos dereitos das e dos traballadores.
Esquerda Unida reclama do Goberno Municipal que fagas as xestións oportunas conducentes a rematar con estas malas prácticas e ataques os dereitos das e dos traballadores. Primeiro mantendo unha reunión de urxencia coa representación sindical e acto seguido obrigando á empresa a ser escrupulosa no respecto ao convenio e aos dereitos das e dos traballadores de Urbaser en Ferrol.