A senadora Vanessa Angustia participa na delegación de observadores do Proceso Nacional Constituínte de Venezuela

Esquerda Unida Nacional, Vanessa Angustia

A senadora de En Marea, Vanessa Angustia, xunto a Fran Pérez, responsable federal de Extensión Internacional de Izquierda Unida, forman parte da delegación composta por 45 observadores/as internacionais que supervisaron o plebiscito do Proceso Nacional Constituínte de Venezuela que tivo lugar nesta fin de semana.

Os observadores internacionais foron os encargados de redactar o informe final electoral, valorado positivamente polo Centro Nacional Electoral. “O pobo de Venezuela votou a súa soberanía pola Constituínte. Voto masivo de 8.089.320 de persoas, moito máis alta da previsión”, sinala Vanessa Angustia en Twitter, ferramenta que está a usar para narrar este proceso.

O labor destes/as observadores/as internacionais nos comicios que se celebraron o domingo 30 ao longo de todo o territorio venezolano consiste en realizar labores de acompañamento e supervisión, tales como revisar soportes técnicos, supervisar o correcto funcionamento das ferramentas electorais, así como visitar colexios electorais nos 24 estados do país.

Segundo explica nas redes persoais Vanessa Angustia, “representantes internacionais de todo o espectro ideolóxico estamos encargadas de velar pola transparencia do proceso, de maneira que a soberanía continúe residindo no pobo venezolano. Unha vez celebrado o plebiscito, as e os integrantes desta delegación internacional formaremos parte do Consello Nacional Electoral para comprobar e certificar o resultado do voto”.

Relacionados