Desde Esquerda Unida mostrouse o seu total apoio ás mobilizacións xa convocadas polos sindicatos, como as concentracións de mañá 20 de maio, e a folga xeral de empregados públicos do 8 de xuño. Asemade, ambas organizacións non descartaron que de intensificarse as medidas contra os dereitos dos traballadores, poida convocarse unha folga xeral.
As delegacións presentes na reunión consideran que o plan de axuste presentado polo Goberno, destinado a reducir drasticamente o déficit público, asesta un duro golpe a pensionistas, empregados públicos, persoas dependentes e parados, e faino, cedendo ás esixencias do núcleo máis conservador da Unión Europea e dos mercados, cuxa actividade especulativa provocou a quebra do sistema financeiro e da economía, fai agora dous anos. Ademais, consideran que o plan de axuste despraza a creación de emprego como obxectivo central da recuperación económica.
En opinión de EU e de CCOO, hai outra forma de abordar a crise. Neste sentido, semella imprescindible a urxente reforma do sistema financeiro, unha fiscalidade progresiva que recupere, entre outras cousas, algunhas figuras tributarias como o Imposto de Patrimonio e o de Sucesións, e unha decidida loita contra a fraude fiscal e a economía mergullada, ao mesmo tempo que unha política industrial, enerxética e educativa orientadas a cambiar o modelo produtivo sobre unha ampla cohesión social.
En consecuencia, piden ao Goberno que retire o plan de axuste e abra un diálogo para pactar outras medidas máis acordes ás necesidades do país.
Por outra banda, en declaración efectuadas na entrevista de “En días como hoy” de Radio Nacional, o coordinador federal, Cayo Lara, indicou que “Apoiaremos unha folga xeral porque a apatía non vai resolver o problema”.
