14 de abril, construíndo República

Construímos República desde o cercano.

Hoxe 14 de abril conmemoramos o 92 aniversario da Segunda República, unha data clave na nosa historia para todas as persoas comprometidas coa democracia, a igualdade e a liberdade no noso país. Ademais de render homenaxe ás persoas que contribuíron coa súa loita ao mellor do noso acervo democrático, queremos facer un chamamento a redobrar a defensa dos valores republicanos.

Despois de case 100 anos, seguen sendo sinónimo de futuro e progreso.

A República é sinónimo de progreso fronte a unha institución arcaica, corrupta e antidemocrática como é a Monarquía, que carece de lexitimidade xa na súa propia esencia: dende a súa condición hereditaria ata o principio de inviolabilidade que a converte nunha institución impune. Este é o ADN da Monarquía. Aínda que traten de limpar a súa imaxe sempre será unha institución que carece de lexitimidade, que non foi elixida pola cidadanía. A monarquía é un lastre para a democracia real, polo que dende Esquerda Unida expomos un proceso de profundización democrática, un proceso constituínte que abra, entre outros, o debate sobre a organización territorial e a xefatura de Estado.

Ante a crise territorial vemos que as dereitas propoñen retroceder cara un Estado máis centralista e autoritario. A solución pasa, ao contrario, por máis democracia. Por iso, dende Esquerda Unida propoñemos un Estado que permita articular a pluralidade de identidades baixo un mesmo proxecto no que se recoñeza a diversidade dun Estado plurinacional como o noso, non reducíndoo a unha mera unión de nacións, senón tamén a un proxecto de convivencia compartida.

Fronte á Monarquía, coa súa vella forma de facer política mediante os enchufismos, as corruptelas e os nexos coas oligarquías económicas, defendemos unha nova forma de facer política baseada na transparencia e a defensa do público. En definitiva, defendemos unha República como a única alternativa posible para a clase traballadora na que os problemas, anhelos e demandas da cidadanía se poñan no centro do debate público. Fronte á decadencia e o pasado, o progreso e o futuro mediante unha alternativa constituínte republicana que sexa capaz de afrontar os retos e necesidades actuais da clase traballadora e os sectores populares.

Dentro de algo máis dun mes terán lugar as eleccións municipais e autonómicas, e máis adiante as xerais. Están en disputa dous modelos de futuro do noso país, un de corte reaccionario que aposta por máis centralismo, desigualdade, desmantelamento dos servizos públicos e retrocesos; e outro modelo centrado no ben común, que aposta por máis progreso e máis dereitos para todos e todas.

Dende Esquerda Unida seguimos traballando por un país máis xusto, democrático e fraterno, isto é, unha República Federal e Solidaria que dea resposta aos retos sociais, económicos, territoriais e culturais do noso país para lograr un reequilibrio en termos de xustiza social.

Baixo estas coordenadas, hoxe 14 de abril facemos un chamamento a toda a cidadanía demócrata e progresista para que se some á construción do futuro proxecto republicano que construímos día a día, dende os nosos barrios, dende os nosos centros de estudo e traballo, dende a sociedade civil.

Dende o cercano.

Porque o queremos todo! A pola Terceira!

Relacionados