Para a executiva nacional de Esquerda Unida Galicia segue pendente dun debate público e profundo sobre as violacións sistemáticas dos dereitos humanos e sobre os crimes cometidos baixo a ditadura de Franco. Aínda non se levou a cabo un inventario completo acerca de todo tipo de vulneración dos dereitos humanos labores durante eses case 40 anos. Debido á imposibilidade real de investigar xudicialmente en España os crimes do franquismo polos numerosos atrancos políticos atopados, dáse a paradoxa de ter que ser investigados por instancias xudiciais foráneas, en concreto pola xustiza arxentina.
A coordinadora nacional de Esquerda Unida e deputada de AGE, Yolanda Díaz, manifesta “que Esquerda Unida pide na moción a condena sen paliativos ao terrorismo de estado da ditadura franquista, e a súa cruel represión sobre a poboación civil simplemente pola súa orientación política, relixiosa ou mesmo cultural”.
Igualmente Esquerda Unida pide aos plenos galegos solidarizarse coas miles de familias que seguen esixindo a revisión dos xuízos franquistas dos seus familiares e mesmo a recuperación física dos restos dos asasinados e asasinadas que están en fosas comúns e enterramentos ilegais en toda Galicia.
Finalmente pídese o traslado ao goberno autonómico e estatal a consideración da data do 18 de xullo como DÍA OFICIAL DE CONDENA DOS CRIMES TERRORISTAS DO FRANQUISMO.
