O sábado 12, ás 13h, no malecón de Ribeira, diante do palco da música, ante ducias de persoas curiosas que se achegaron a escoitar, Esquerda Unida-Os Verdes bosquexou as liñas mestras do programa político co que concorre nestas eleccións xerais, demostran do que hai alternativa diante da crise política, económica, social e medioambiental .
Presentados por Xabier Ron, fixeron uso da palabra Manolo González, histórico militante de Esquerda Unida no Barbanza, sempre vencellado, con xenerosidade, á loita contra as inxustizas sociais; Suso Díaz, candidato ao Senado, que debuxou con mestría pedagóxica en que consisten as desastrosas políticas neoliberais do PSOE no Estado e do PP en Galicia e explicou as medidas máis relevantes en materia de xustiza financeira e en creación de emprego; pechou o acto, Mari Luz Canal, cabeza de lista ao Congreso, que se gañou ao público asistente mediante un discurso directo, sen florilexios retóricos, dirixido a explicar con sinxeleza as deficiencias do noso sistema democrático e as máis importantes accións que Esquerda Unida-Os Verdes quere poñer en marcha para rexenerar a democracia e avanzarmos en xustiza social.
