Santiago de Compostela, 11 de setembro de 2013.- A continuada e obsesiva ofensiva do Partido Popular contra a educación pública de calidade non descansa. E ten efectos colaterais que supoñen aínda máis dificultades para as familias galegas, atacadas polas políticas da dereita de xeito brutal. Os deputados de Alternativa Galega de Esquerda (AGE) Ramón Vázquez e Xabier Ron veñen de denunciar que a Consellaría de Educación que maldirixe Jesús Vázquez fai pagar a tarifa completa dos comedores escolares a familias de alumnos desviados dos colexios da súa zona por falta de prazas.
“Segundo o decreto de comedores”, denuncian Vázquez e Ron, “as familias non poden usar os comedores de centros se os alumnos están matriculados fóra da súa área, unicamente se sobran prazas e pagando a tarifa completa. Dá igual a renda familiar e os baremos estabelecidos pola Xunta. Pero cónstanos que Educación fai pagar a tarifa completa, independentemente da súa renda, a familias de alumnos desprazados a escolas por non haber prazas nos da súa zona. É intolerábel”. Aos parlamentarios de Alternativas, que detectaron esta anomalía discriminatoria en colexios de Lugo, tamén lles chegou a información de que a dirección dos colexios anima ás familias a que presenten queixas na Xunta, pero non solucionan nada.
