Esquerda Unida advirte ao goberno central que o investimento no corredor mediterráneo non pode facerse en detrimento do corredor atlántico

Nos últimos días coñeceuse ao través dos medios de comunicación que o Goberno Central plantexa triplicar os fondos dedicados ao desenvolvemento do corredor mediterráneo a costa dos fondos procedentes da UE para a pandemia de Covid-19. Sen embargo, non existe polo momento ningunha noticia de que os vindeiros orzamentos do Estado conteñan partidas semellantes para poñer en marcha o corredor atlántico.

Esquerda Unida lembra que o corredor ferroviario atlántico é absolutamente imprescindible para frear a progresiva perda de emprego industrial que sofre Galicia e o norte de España, mellorar as conexión económica con Portugal e incrementar polo tanto, a competitividade económica de toda a rexión.

O Congreso aprobou por unanimidade fai menos dun mes una iniciativa orientada a esixir ao Goberno Central que ambos corredores fosen incluídos no Plan Nacional de Recuperación e o propio Presidente do Goberno prometía novamente fai uns días levar a cabo o corredor Atlántico no XXXI Cumio Luso-Español. Sen embargo, as novas que proveñen do Goberno non semellan asegurar que ese investimento quede reflexado nas vindeiras contas orzamentarias.

Esquerda Unida lembra que resulta imprescindible que a conexión Galicia-Porto sexa incluída no Corredor Atlántico como rede básica e que o Ministerio estableza un plan específico para desenvolver o antes posible tanto estas infraestruturas coma o conxunto do corredor Atlántico, polo que Esquerda Unida insta ao Goberno Central a apostar nos vindeiros orzamentos do Estado polas mesmas e advirte que o investimento no corredor Mediterráneo e noutras infraestruturas non pode facerse de ningunha maneira en detrimento do desenvolvemento da liña Atlántica.

Relacionados