Esta mañá tivo lugar a rolda de prensa do Foro Galego de Inmigración para presentar a campaña: “CONTRA AS DEPORTACIÓNS, BOICOT A AIR EUROPA E A GLOBALIA” en A Coruña, unha campaña que se seguirá ata finais de maio dende as redes sociais co hagstag: #STOPDEPORTACIÓNS.
No acto, participaron diferentes representantes do Foro Galego de Inmigración, entre eles, Xabier Ron, membro da dirección de Esquerda Unida e deputado de AGE, quen esixiu “o cesamento inmediato dos voos de deportacións forzadas de persoas estranxeiras” e recordou “a súa total oposición ás deportacións express”.
No último bienio, as compañías Air Europa e Swift Air, do Grupo Globalia, participaron nunha práctica que é unha clara violación dos dereitos humanos, “polo que insistimos na urxencia de acabar con estas operacións humillantes de deportación masiva e insistimos en que se garantan, dunha vez por todas, os dereitos das persoas migrantes”, sinalou o deputado.
Neste senso, Ron lembrou que “o Ministerio do Interior pretende continuar a atentar contra os dereitos humanos e vulnerar as normas de dereito internacional con cartos públicos. Exactamente, este ano regalou un total de 11,8 millóns que serviron para alimentar un negocio baseado en prácticas ilegais e ilexítimas”, rematou.