Esquerda Unida celebra o pronunciamento do Tribunal Xeral da Unión Europea que anula os acordos entre Marrocos e a Unión en materia de agricultura e pesca por ser contrarios ao Dereito Internacional.
O órgano xurisdicional sentenza que os acordos non son legais por facerse sen o visto e prace do Sáhara Occidental, territorio ao que pertencen as terras e augas afectadas polos mesmos.
Esquerda Unida leva anos denunciando que os acordos contraviñan as resolucións da propia xustiza europea, vulnerando as sentenzas do Tribunal de Xustiza da Unión Europea. En particular o fallo do 21 de decembro de 2016 que concluíu que o Sáhara Occidental non pertence a Marrocos e que, polo tanto, non pode aplicarse ao seu territorio ningún acordo da UE con Marrocos sen o consentimento do goberno saharaui.
Así as cousas, a actual sentenza deixa no aire a situación da maioría da flota pesqueira española no banco sahariano, entre a que se inclúen barcos galegos, polo que Esquerda Unida chama á Consellería do Mar e ao Ministerio de Agricultura, Pesca e Alimentación a que urxan á Unión Europea a sentarse a negociar cos lexítimos representantes do Sáhara Occidental un acordo que permita ás embarcacións galegas e españolas seguir traballando e ao mesmo tempo garanta a soberanía do pobo saharaui sobre os seus recursos.
Neste contexto, Esquerda Unida lembra a necesidade de que tanto España coma a Unión Europea cumpran coas súas responsabilidades en materia de descolonización do territorio saharaui e aseguren a celebración do referendo de autodeterminación en cumprimento dos acordos internacionais.
