Esquerda Unida denuncia a situación da residencia privada de maiores de Salvaterra ante o Defensor del Pueblo

Hoxe a coordinadora nacional de Esquerda Unida, Eva Solla trasladou en rolda de prensa a denuncia que a organización vén de presentar ante o Defensor del Pueblo ante a situación insoportable que se está a vivir nas residencias de maiores privadas, en concreto a denuncia fai referencia á residencia de Salvaterra.

Solla tivo palabras para as sanitarias e sanitarios que están a traballar con escasez de medios humanos e materias nunha situación excepcional de pandemia e que deriva hoxe mesmo na folga convocada polos traballadores da UCI de Compostela. Tamén o apoio ás traballadoras de Ferrol ante o recente aumento de contaxios que están a aparecer no complexo hospitalario.

A preocupación do avance da Covid nas residencias privadas de maiores do país é unha evidencia de que a Xunta de Galicia non está a actuar coa responsabilidade que debera. A experiencia do mes de marzo non modificou o xeito de actuar tardío da Xunta ante a atención a persoas dependentes e especialmente vulnerables como son os nosos maiores. 

“Oito meses despois, as residencias de maiores afrontan a covid con carencia de recursos humanos e materias. O avance nos contaxios da residencia de Mos conta xa con 145 infectados entre o persoal e as usuarias e usuarios da mesma, poñen en evidencia que a xestión privada destes centros non debera continuar a darse” di Eva Solla.

As recentes  declaracións de Josefina Fernández conselleira delegada de Domus VI, na Comisión de Reparación do Parlamento de Galicia foron “ademais de  desafortundas, irrespetuosas” manifesta Solla, “para coas familias das persoas falecidas”. A contínua situación de falta de medios humanos e materiais nestas residencias privadas obriga a dotalas de persoal público por parte da Xunta, ante isto, a Xunta debera tomar medidas para que os coidados volvan a estar baixo xestión pública.

 

Denuncia da Residencia de Salvaterra 

Esquerda Unida traslada esta denuncia ao Defensor del Pueblo xa que este alberga o mecanismo de prevención da tortura. Esta institución  xa redactou algún informe referente á situación no psiquiátrico de Conxo. A falta de persoal na residencia de Salvaterra, segundo apuntou o sindicato CIG,  no 2017 foi denunciado por parte das traballadoras que posteriormente foron despedidas, cuestión que evidencia que a falta de persoal vai en detrimento da atención das persoas residentes ademais da sobrecarga de traballo do persoal da propia resdencia.

Esquerda Unida dando continuidade á denuncia presentada hai uns meses no Parlamento Europeo  – que actualmente se atopa en fase de investigación- sobre a situación e a actuación nas residencias durante a Covid, presenta agora esta denuncia ante o Defensor del Pueblo para que investigue a situación na residencia de Salvaterra en concreto.

Á situación de atención nas residencias, súmanse a restricción de visitas motivada pola situación da covid, o que incrementa aínda máis a vulnerabilidade das persoas residentes nestes centros. A privación de acceso a obxectos persoais ou peche con chave nos cuartos son exemplos das situacións que se están a dar, segundo denuncian as traballadoras, na residencia privada de Salvaterra.

Esquerda Unida considera que na Residencia de Salvaterra de Miño se están a vulnerar dereitos fundamentais das e dos residentes, como é o dereito á integridade física e moral e o dereito á non discrimación que se aplica a persoas que teñen restrinxida a súa mobilidade.

“Nesta residencia se está a dar un trato degradante, polo que o poñemos en coñecemento do Defensor del Pueblo para que teña constancia e valore a situación” conclúe Eva Solla .

Relacionados