Esquerda Unida, unha vez máis, recorda a aberración acontecida na comarca de Monterrei pola teima da Xunta de Galicia de seguir a especular co ben común, esta vez, mediante a construción dun hotel de luxo no Castelo de Monterrei, toda unha agresión inxustificable ao Patrimonio cultural.
A día de hoxe, as obras de rehabilitación do Castelo de Monterrei continúan pese a que, dende o inicio, todas as organizacións de preservación do noso patrimonio cultural, especialmente a Plataforma en Defensa do Castelo de Monterrei, as criticaban. “Non entanto, agora, se coñece un novo capítulo no errado e sospeitoso comportamento mercantilista da Xunta de Galicia respecto ao noso patrimonio en Monterrei”, sinala Xabier Ron, membro da dirección de EU e deputado de AGE.
“Agora sábese que proseguen as obras na Torre das Damas, onde se pretende facer un mirador e un xardín con plantas aromáticas. Mentres, a cidadanía non pode acceder a ningunha destas partes do Castelo. Preguntámonos se ditas obras, que serían ilegais, se están levando a cabo ou gardan o debido respecto a unha sentenza de decembro que anulaba a licenza de obra para construír un hotel de Paradores Nacionais estando á espera de que o recurso interposto ante a Audiencia Nacional se resolva”, sinala Ron.
Neste punto, Ron levará ao Parlamento, por medio de AGE, unha batería de preguntas referidas á situación na que se atopan as obras, que parece que se seguen a realizar no Castelo e se a Xunta de Galicia cre que a conversión desde Ben de Interese Cultural (BIC) nun hotel parador, que se mantén pechado varios meses ao ano, é beneficiosa para a cidadanía galega.
“En efecto non só a Xunta entregou por un tempo de 75 anos un BIC e un Monumento Nacional á empresa Paradores S.A. (en situación de ERE dende novembro de 2012), senón que as obras seguen a realizarse baixo o silencio e mantendo o recinto pechado, sen que a cidadanía poda acceder e gozar do Castelo”, recorda Ron.
“O 7 de agosto de 2015, o presidente Núñez Feijóo comentaba, logo da súa inauguración como parador, que este Castelo pertencía á mellor rede de hoteis de Europa. Preguntámonos se o destino dun BIC é permanecer pechado durante varios meses ao ano. Este feito demostra que non tivo ningún sentido a conversión do Castelo de Monterrei en parador. E moito menos, cando o vello parador, situado a uns escasos 500 metros, xa coñece peches temporais que exceden o acordado”, remata.
