Galicia en Común-Anova Mareas presentou en Vigo a candidatura pola provincia de Pontevedra que concorrerá as vindeiras eleccións autonómicas do 12 de xullo. No acto de presentación interviron Eva Solla, Iria Figueroa e Marcos Cal, números un, dous e tres da lista provincial. Ao acto, celebrado na histórica Praza de Compostela, asistiron tamén os concelleiros da Marea de Vigo, Rubén Pérez e Oriana Méndez.
A cabeza de lista pola provincia de Pontevedra, Eva Solla, destacou a relevancia da cidade de Vigo como motor laboral e industrial da provincia, onde as taxas de paro son extremadamente elevadas. “O Goberno do Partido Popular deixou unha perda de 54.000 postos de traballo no conxunto do pais. Esa realidade, que é anterior á crise do coronavirus vén relacionada coa ausencia de políticas públicas de emprego. O partido popular deixou de investir 135 millóns de euros en políticas de emprego, cartos que estaban nos orzamentos e non foron executados para crear emprego no noso país”. “Iso – engadiu Solla – é unha auténtica desvergoña coa bolsa de pobreza que ten esta cidade e o conxunto do provincia”.
“A Galicia que imos construír e pola que estamos dispostas a traballar a partir do día 12 de xullo é unha Galicia que non deixa a ninguén atrás” afirmou a cabeza de lista pola provincia. “Precisamos políticas activas de emprego. Galicia en Común comprométese a aprobar unha lei de emprego que defina as políticas de inclusión e de inserción laboral para que as persoas que teñen menos oportunidades non queden atras. As persoas paradas de longa duración, maiores de 45 anos e menores de 30 e a xunta ten que facerse cargo”. Durante os pasados anos, “non só non houbo interese por parte do Goberno de Feijoo senón que nin tan sequera se executaron os orzamentos adicados a elo”.
Iria Figueroa, número dous pola provincia de Pontevedra, resaltou a defensa dos dereitos da maioria traballadora do país, “ao carón da que sempre vai estar” como elemento común das partes que forman a candidatura. A candidata puxo como exemplo o dereito a vivenda digna, “dereito vulnerado durante os once anos de Goberno do partido popular e de Nuñez Feijoo”.
“Desde Galicia en Común-Anova Mareas comprometémonos firmemente a garantir ese dereito a unha vivenda digna. Consideramos que é o momento de dicir que xa abonda, a partir do 12 de xullo deben rematar de forma definitiva as confabulacións entre o Goberno da Xunta e os fondos boitre que especulan cun dereito fundamental” matizou.
Pola súa banda, Marcos Cal, número tres da candidatura provincial, incidiu na pluralidade e diversidade da candidatura “como unha combinación moi positiva de persoas con diferentes experiencias tanto dentro como fóra das institucións”. “Unha candidatura que entende que é neste momento histórico no que nos xogamos que modelo de sociedade e de país queremos para o futuro”. “ É o momento de decidir se queremos seguir na senda da precariedade traída polo partido popular nos últimos once anos ou o momento de mudar a realidade e rematar con esta década negra de Feijoo”.
