David Fernández Calviño defende que “arredor dos incendios forestais non pode haber lucro de empresas privadas”.
Santiago de Compostela, 26 de marzo de 2013.- “A presenza de empresas privadas na extinción dos lumes é contraditoria co principio que defende Alternativa Galega de Esquerda: arredor dos incendios non debe haber lucro”. Baixo este principio presentou o deputado de AGE David Fernández Calviño unha proposición non de lei para que o Parlamento inste á Xunta a colocar baixo titularidade pública os labores de extensión de incendios, ademais de os encadrar nun mando único do Goberno galego. “O problema de que compañías privadas se dediquen a apagar lumes é que deixan de ter beneficios se non hai incendios”, expuxo Fernández Calviño.
O parlamentario de Alternativa tamén denunciou, ante o silencio cómplice do PP, un caso incipiente de corrupción na declaración como deserto do concurso de adxudicación de helicópteros. “Xente que traballa na extinción de incendios fala que detrás desta non licitación de incendios atópase o cesamento dun xefe do servizo de extinción de incendios polas súas falcatruadas na contratación de helicópteros”, afirmou, antes de criticar a temeridade da Xunta, que a piques de comezar abril non ten dispoñíbeis helicópteros antiincendios.
