Nun pequeno encontro con xente nova da universidade, o candidato Xosé María Dobarro adiantou a primeira iniciativa a desenvolver no Congreso en materia de universidade no próximo mandato: a desafección de diferentes terreos militares de Esteiro para ampliar o campus universitario:
– o cuartel de Esteiro
– o cadro pequeno
– a residencia militar de oficiais
– a parcela do INVIFAS
Estes catro elementos permitirían unha ampliación do campus universitario de Ferrol, necesitado de investimentos que o desenvolvan. A outra das inquedanzas da xente nova que recolleu o candidato de EU foi a referida a creación da residencia universitaria pública, que resta na parálise a conta do estrangulamento do financiamento universitario. Dobarro sinalou que será a outra prioridade do Grupo no mandato que vén.
Esquerda Unida – Os Verdes avanzou no transcurso do encontro as liñas programáticas clave para artellar un fornecido sistema educativo público,mediante a promulgación dunha lei de Medidas para a Extensión e mellora da Educación Pública que contemple:
– Aumento orzamentario de alomenos un 1% para dotar de plantillas e recursos pedagóxicos necesarios para que os centros públicos recuperen a centralidade da rede pública no exercicio do dereito á educación.
– A constitución dunha única rede de centros de titularidade e xestión pública, coa programación temporal de supresión dos concertos mediante a súa incorporación á rede pública ou a súa renuncia a recibir fondos públicos.
– A afirmación do principio de laicidade para que a relixión reste confinada ás igrexas.
– Recuperación do poder adquisitivo do profesorado, constituído como corpo único de docentes, aumento de plantillas e elaboración participada dun estatuto docente.
– Creación de comisións de escolarización centralizadas para evitar calquera discriminación na selección do alumnado.
– Participación efectiva da comunidade educativa, declarando deber público inexcusable a asistencia das nais e pais ás xuntanzas programadas nos centros. Proceso de descentralización dos distritos escolares e plus de autonomía nos centros para abordar a súa problemática e contesto específica.
Os elocuentes e estarrecedores datos de desemprego, pobreza e abandono escolar esixen das administracións públicas, Xunta e Ministerio un esforzo coordinado para pular de maneira ambiciosa pola educación como ferramenta de inclusión social e útil emancipador en tanto que xeradora de consciencia crítica.
A candidatura de EU – Os Verdes, noutra orde de cousas, lamenta o falso debate que Rajoy e Rubalcaba escenificarán esta tarde, moedas devaluadas dun Jano bifronte que van xesticular para dar a impresión de non ser copias obedientes do programa emanado dos mercados capitalistas.