Esquerda Unida considera que os problemas de inseguridade en Novo Mesoiro necesitan un estudo especial debido ao elevado tempo de resposta da policía polas dificultade de acceso ao barrio debido a que este barrio se atopa practicamente incomunicado a causa das enormes eivas de mobilidade e a paupérrima conexión por estrada, está a alarmar á veciñanza deste barrio coruñés densamente poboado que ten un grave déficit de infraestruturas e mobilidade, debido a que as obras de urbanización recepcionaronse incorrectamente porque anteriores gobernos municipais priorizaron os intereses dos promotores sobre os dos veciños.
O voceiro de EU-V, César Santiso, indicou que “diante desta situación que provoca alarma social, os poderes públicos non so no deben permanecer de brazos cruzados senón que teñen que actuar proactivamente e coordinarse. A veciñanza de Novo Mesoiro o merece logo de anos de esquecemento por parte dos distintos gobernos municipais”.
O grupo municipal de Esquerda Unida – Os Verdes presenta unha moción para instar ao alcalde a convocar de urxencia a Xunta Local de Seguridade para tratar a inseguridade en Novo Mesoiro. Chegou o momento de que o goberno municipal demostre á cidadanía, na praxe, as vantaxes de reactivar a Xunta Local de Seguridade que tanto publicitou o PP. Así a parte resolutiva da moción expón:
Primeiro.- O Pleno do Concello da Coruña insta ao Sr. Alcalde a que leve a cabo as accións necesarias para incluír na orde do día da próxima reunión da Xunta Local de Seguridade o estudo e resolución da grave situación de inseguridade que vive o barrio de Novo Mesoiro e as dificultades da policía para poder ofrecer unha pronta resposta debido as deficitarias vías de comunicación para acceder a un barrio tan altamente poboado.
Segundo.- O Pleno do Concello da Coruña insta ao Sr. Alcalde a que convoque de urxencia á Xunta Local de Seguridade para tratar o devandito problema.
Terceiro.- Que se lle dea traslado desta moción á Asociación de Veciños de Novo Mesoiro.
