Santiago de Compostela, 30 de xullo de 2013.- Alternativa Galega de Esquerda (AGE), a través da súa deputada Eva Solla, vén de preguntar á Xunta por que desviou feridos no accidente de tren de Angrois a unha clínica privada de Compostela mentres recursos do sistema sanitario público ficaban sen uso. “No hospital de Conxo do Sergas, en Compostela, ducias de profesionais agardaron toda a noite do sinistro nos seus postos, pero alí non chegou ningún ferido”, denuncia Solla na argumentación da pregunta parlamentaria rexistrada esta mañá , “malia que o centro conta con quirófanos dispoñíbeis, camas de hospitalización e unidade de coidados intensivos”. O hospital de Conxo atópase a poucos metros da curva da Grandeira, onde colisionou o tren, e, porén, alguén decidiu levar os feridos ao centro privado da Rosaleda.
“Estes feitos resultan preocupantes”, engade Solla, “porque supoñen un claro desaproveitamento de recursos públicos e mesmo poden significar perda de tempo e medios en traslados de vítimas graves”. A parlamentaria de AGE lembra tamén que, malia eventuais erros de coordinación, as sanitarias e sanitarios “deron un grande exemplo de profesionalidade e humanidade ao se presentaren en moitos casos voluntariamente aínda estando de vacacións, en libranza ou en paro”.
