Este sábado 29 de xuño Ourense acollerá a Festa Anual do Partido Comunista de Galicia (PCG), que se celebrará outro ano máis no Campo da Feira (situado na entrada da cidade, a carón do río Miño).
No acto, que arrincará ás 11 horas e rematará ás 19 horas, haberá diferentes mesas e actividades nas que se abordarán os retos presentes e futuros para a esquerda revolucionaria en Galicia e España. Tamén se analizará a situación da clase obreira e se afondará sobre as propostas necesarias para construír un país que poña no centro as necesidades e intereses dos sectores populares.
Na primeira mesa, que arrancará ás 11.30 horas co título de “Industria, Motor dunha Economía ao Servizo do Pobo”, participará o director da Fundación de Investigadores Marxistas, Eduardo Sánchez; o secretario xeral de CCOO Industria Galicia, Víctor Ledo; o presidente do comité de Empresa de Alcoa A Coruña, Juan Carlos López Corbacho e Carlota Álvarez. militante da Xuventude Comunista.
A segunda mesa de debate será ás 16.30 horas baixo o título “A Esquerda tras o Ciclo Electoral, Camiñamos Unidas” e estará a cargo do deputado do Parlamento Vasco e membro da dirección federal de IU, Íñigo Martínez; a concelleira da Marea de Vigo e militante de Anova, Oriana Méndez; a deputada no Parlamento de Galicia e membro do Consello de Cordinación de Podemos Galicia, Julia Torregosa e a coordinadora nacional de Esquerda Unida, secretaria xeral do PCG e vicepresidenta do Parlamento de Galicia, Eva Solla.
A Festa rematará co mitin político de peche, da man de Eva Solla, coordinadora nacional de Esquerda Unida, secretaria xeral do PCG e vicepresidenta do Parlamento de Galicia, de Yolanda Rodríguez, responsable da Área de Converxencia do PCE e Miguel Cimas, secretario político da Xuventude Comunista.
Ademais destes espazos de debate, haberá un xantar popular e espazos de lecer.
