Un conxunto de entidades que prestan un exemplar servizo de interese público en materia de cultura ao dar sostén á realización do ciclo de teatro en Caranza, os “Domingos a escena”, que xa constitúen por dereito propio gañado nestes anos un ben cultural consolidado para a nosa cidade. A súa preservación de imposicións unilaterais constitúe un deber e de non facelo así somentes se pon en risco esta feliz aventura cultural de base.
O noso Grupo Municipal demándalle ao concelleiro de cultura que rectifique e chegue a un punto de entendemento e acordo cos grupos de teatro aficionado da nosa cidade, que nestes días fixeron pública a súa posición crítica.
Esta iniciativa cultural, os “Domingos a escea”, supón un elemento exemplar de como achegar a cultura aos barrios e facelo dun xeito participativo e arraizado no tecido cultural da nosa propia cidade. Hai que fuxir, xa que logo, da imprudencia de poñelo en cuestión cos riscos derivados dun enfrontamento coa grande maioría do tecido cultural involucrado ate o momento na súa consolidación.
Esquerda Unida pide, en suma, achegar todos os esforzos necesarios para superar a situación actual e acadar un acordo onde todos os actores implicados poidan sentirse a gusto. É posible e cómpre facelo, polo ben da cultura de base na nosa cidade.
