Alternativa Galega de Esquerda denuncia a actitude insensible e hipócrita da conselleira de Traballo e Benestar, Beatriz Mato, que unha vez máis ataca ás familias con menos recursos obrigándoas a pagar máis polo coidado dos seus pequenos ao subir o IPC aos prezos das escolas infantís. Ao Partido Popular parece non lle chegar con recortar salarios, empeorar as xornadas e as condicións laborais dos traballadores senón que ademais pretende afogar aínda se cabe un pouco máis as familias do noso país facendo que paguen máis por servizos básicos e que deberían ser universais e gratuítos para todos os galegos e galegas que precisen levar aos seus fillos e fillas a unha escola infantil.
Mentres os membros do goberno galego e a propia conselleira Beatriz Mato fan declaracións asegurando estar moi preocupados pola situación que están a atravesar as familias, a realidade é que a súa política demostra todo o contrario e seguen a atacar a aqueles que menos recursos teñen como demostra o feito por exemplo que só aquelas familias que cobren menos de 150 euros mensuais estarán libres de pagar a escola infantil, o que na realidade suporía que esta familia directamente non tería que dar de comer aos seus pequenos.
Ante esta falla de sensibilidade, Alternativa Galega de Esquerda esixe á conselleira e á Xunta que reformulen canto antes os prezos deste servizo fundamental para as familias galegas que debería ser unha axuda e non unha carga máis á que moitas non poderán facer fronte grazas as políticas agresoras do Partido Popular.
