O deputado Antón Sánchez lembra que o Tribunal de Contas europeo emitiu un informe en que Galicia salienta polos erros na concesión e tramitación de subvencións
Santiago de Compostela, 21 de marzo de 2013.- Técnicos da Xunta de Galicia avalaron coa súa sinatura unha escura trama, arestora investigada polo xulgado de Corcubión, de subvencións para a reforestación de terras en concellos como Dumbría, Muxía e Vimianzo. Estas axudas, concedidas no distrito forestal V de Vimianzo, eran solicitadas por particulares –mesmo con firmas simuladas ou coa identidade de persoas falecidas- pero sen o seu coñecemento. O importe das mesmas remataba sempre no peto dun empresario. Pero eses subsidios inclúen presuntas inspeccións de campo realizadas por persoal da Consellaría de Medio Rural e autorizadas por técnicos do Goberno galego. “É inaceptábel que os responsábeis do PP na Xunta agachen a súa responsabilidade nesta trama”, denuncia o parlamentario de Alternativa Galega de Esquerda (AGE), Antón Sánchez, “e non fagan nada e así acepten unha situación de fraude e corrupción”.
Sánchez tamén lembra que o tribunal de Contas da Unión Europea emitiu un informe segundo o que Galicia é unha das “rexións” en que máis se dan os erros nas subvencións. O deputado de AGE presentou unha pregunta para que o Goberno galego responda en sede parlamentaria (no arquivo anexo) sobre se vai depurar responsabilidades na trama de subvencións de Vimianzo e para coñecer que opinión lle merecen as conclusións do documento do Tribunal de Contas europeo.
