Yolanda Díaz e Javier Galán avanzaron as posicións que a nosa organización mantén no eido da necesaria rehabilitación integral de Recimil nunha cordial xuntanza de traballo co Director Xeral e técnicos da Consellaría. Ámbalas dúas partes amosaron a necesidade de profundar na colaboración institucional para dar solución a un barrio, que queremos lembrar resta protexido e necesitado dunha fonda acción rehabilitadora.
Esquerda Unida amosou a súa defensa das políticas de recuperación e rehabilitación para os espazos históricos da Magdalena e Ferrol Vello. Dar continuidade e profundidade a laboura rehabilitadora semella fundamental para acadar unha recuperación do noso patrimonio e para desenvolver unha outra política de vivenda, na que a rehabilitación e o enfoque social se conxuguen a prol de facilitar o acceso á vivenda aos colectivos máis desfavorecidos así como para gañar unha recuperada vida urbana neses ámbitos.
Non deixaron pasar a ocasión a voceira de EU e o concelleiro Javier Galán para trasladarlle ao Director Xeral a cuestión da necesaria protección como BIC do dique da Cabana. Cómpre atender a súa protección e evitar progresivos deterioros dunha peza única e valiosa, parte da historia da nosa cidade.
Con este encontro, EU trasladoulle á Consellaría as ideas e posicións da nosa organziación encol de cuestións que van formar parte da axenda inmediata e importante da cidade tralos comicios de maio.