Yolanda Díaz reclamou na última xuntanza do IMFACOFE a elaboración dun informe xurídico que permita clarexar as dúbidas que ten o noso Grupo Municipal en relación con dúas cuestións da proposta do Goberno:
– O tema da retroactividade da medida que propón o Goberno, que tenta que de saír adiante se aplique de maneira retroactiva dende 2009. Circunstancia que ao noso xuízo non se pode producir.
– A cuestión de que se pretenda realizar a formación das empregadas e empregados públicos en horario fóra do horario laboral, feito que tamén non nos parece que sexa posible nen desexable.
Alén das cuestións que suscitan para nós dúbidas sobre a súa legalidade, Esquerda Unida manifesta o seu rexeitamento diante dunha proposta de marcado carimbo neoliberal, que recolle os modelos máis agresivos da empresa privada no que fai á valoración do traballo das empregadas e empregados ( a proposta do Goberno estabelece un sistema de retribución complementaria de natureza exclusivamente subxectiva no IMFACOFE ao pasar a depender na proposta do Goberno non do traballo efectivamente realizado conforme aos criterios obxectivos marcados e si da percepción que do traballo efectuado teña a dirección do servizo ).
Proposta do Goberno que racha cos criterios de igualdade de todos os traballadores e traballadoras do concello, que deben de ter uns criterios homologables para todos eles, circunstancia que se altera con esta proposta ad hoc para o IMFACOFE.
Esquerda Unida denuncia tamén a situación de privatización do servizo de inspección fiscal do ICIO e o IAE. No Consello de Administración de maio se aprobou a prórroga da asistencia técnica, que comezou en maio de 2009. Esquerda Unida reclama a volta a xestión polos traballadores e traballadoras do IMFACOFE deste servizo. Non podemos compartir que se desaproveiten as competencias e capacidades da plantilla para privatizar un servizo público.
