As operacións de endebedamento en curso non deixan de revelar tanto a gravidade da crise económica canto a crónica falla de financiamento municipal, circunstancias ámbalas dúas da meirande importancia e que merecen un esforzo de todas e todos por achar solucións comúns que as resolvan. O déficit estrutural de recursos municipais ínflase agora coas menores achegas do Estado e coa vontade política dos Gobernos da Xunta e do Estado de reducir o gasto público; cruzada contra o gasto público que serve aos inimigos da presenza e protagonismo do público e o social no eido da economía, no ámbito da res publica.
As actuacións propostas teñen como eixo director a mellora das dotacións de equipamentos sociais , de servizos e culturais para a nosa cidadanía. Temos a certidume que a súa realización suporá un salto adiante notable na transformación da fisonomía da cidade.
A nosa proposta é debedora doutras que xa formulamos ao longo deste mandato corporativo, e que até o de agora non conquerimos facer realidade, diante da inoperancia e incumprimentos do actual Goberno Municipal.
O Grupo Municipal considera, xa que logo, que o destino da operación de endebedamento a realizar polo concello débese de empregar na seguinte relación de actuacións na nosa cidade:
– A creación dun Centro Social de Maiores no barrio de Caranza para atender o lecer e a socialización dos maiores do barrio.
– A remodelación do mercado municipal de Caranza e da Avda. do Mar.
– A dotación dun aparcadoiro na zona do Auditorio e do Conservatorio de Música.
– O arranxo e mantemento das zonas verdes e zonas públicas de Caranza, caso das zonas verdes das rúas Pedro Carbajal e Cádiz, ou da Praza Guillermo Feal.
– A reurbanización da Praza das Vítimas do 11 de Marzo no barrio de Esteiro.
– A adquisición e rehabilitación do inmoble coñecido como Forno Bellón, para a súa adecuación como centro social do barrio de Esteiro.
– A compra e acondicionamento da casa da Fenya sita en Canido para situar nela o Museo da Cidade.
– A ampliación da Casa de Acollida coa adquisición duns terreos adxacentes e a súa incorporación á Casa.
– A demolición da nave do mercado para avanzar na recuperación e artellamento da zona baixa da cidade.
– A dotación de beirarrúas na rúa Basanta, en San Xoán.
– A recuperación da Zona Verde de San Francisco.
– A rehabilitación da Costa de Mella.
– A adquisición da casa de Carvalho Calero no barrio de Ferrol Vello.
– A intervención na Fábrica de Lápices, como dotacional público de servizos.
– Completar a rehabilitación do Ateneo Ferrolán.
– O proxecto museístico do Torrente Ballester.
– A recuperación do antigo Hospicio.
– Rematar a intervención na Casa do Coronel para adicala a máis importante colección naturalista de Galicia, coadxuvando ao traballo cotián que desenvolve a SGHN.
– A reurbanización, no ensanche, da Praza de Sartaña.
– A suscrición do convenio coa Xunta, e mailo o seu desenvolvemento, para soterrar as liñas de alta tensión e mailo cambio de emprazamento da subestación de Santa Mariña.
– A rehabilitación do Bambú Club e maila creación da Empresa Municipal de Vivenda para xestionar a rehabilitación do barrio de Recimil.
– O remate das obras da Oficina de Rehabilitación na Magdalena.
– A dotación orzamentaria suficiente para desenvolver o plan de mobilidade, trala seca do ano pasado onde non se investiu un euro neste eido.
– A dotación dunha partida específica para as obras na Zona Rural, en particular as vencelladas co saneamento.
– A modificación puntual do PXOM para garantir a protección integral da fraga do Menáncaro.
– A creación dunha ruta de sendeirismo no Menáncaro que se prolongue no río da Xardiña até a piscina natural, hoxendía botada a perder coa sucidade, que se forma entre o campo de fútbol da malata e FIMO.
– A creación dun camping municipal.
– A recuperación da praia urbana da Malata.
– A modernización da administración local, en particular cunha partida que permita a creación de dous puntos de atención á cidadanía en Caranza e Serantes.
– A dotación de cobertura wifi nos espazos públicos da cidade.
