A dirección local de EU acompañada do Grupo Municipal denunciou hoxe en rolda de prensa a actitude de dilación indebida e mistificación do PP no tema do CEIP San Xoán de Filgueira, dado que non se apuran as horas para que se reúnan con urxencia a dirección do centro coa Consellaría de Educación, nin se deixa de intoxicar con mentiras á opinión pública acerca da magnitude do recorte.
Na Xunta de Voceiros pedida por EU non se conseguiu que o Goberno Municipal adiantara a reunión da dirección do centro educativo cos representantes da Consellaría de Educación. Así hoxendía seguen pechados e con novas mobilizacións na comunidade educativa e a Xunta segue deixando pasar os días sen sentarse a negociar.
Esquerda Unida denuncia as manobras para intoxicar a opinión pública acerca das pretensións de recorte de profesorado. O recorte, porque de recortes falamos, non é dun só docente, senón de sete. O PP pretende eliminar a sete profesores e deste xeito matar os programas de atención educativa especial e a diversidade. Eliminar unha característica esencial da praza educativa dun centro senlleiro en materia de educación para a convivencia e a igualdade.
EU reclama que se convoque con urxencia ao Consello Municipal de Educación, que reúne á pluralidade da comunidade educativa da cidade, para que este órgano entenda e asuma as demandas educativas do CEIP San Xoán.
Non cabe confundir os termos da polémica: o alcalde non ten que mediar entre dúas partes enfrontadas. O alcalde ten que defender as necesidades educativas das nenas e nenos do San Xoán de Filgueira, necesidades educativas que non se atenden se perden profesorado. O alcalde -e tal lle reclama Esquerda Unida- ten que poñerse a liderar as xustas e necesarias demandas deste centro escolar de Ferrol.
