A xuntanza, que foi solicitada por Esquerda Unida para coñecer de primeira man a problemática do barrio, desenvolveuse de maneira moi produtiva durante máis de dúas horas. A delegación de EU, que tomou boa nota das necesidades e demandas da veciñanza do barrio como os problemas de tráfico, a perdida da tradicional vida de barrio coruñesa ou a necesidade de descentralizar os espectáculos culturais, puido constatar a coincidencia tanto no análise dos principais problemas da cidade como nas posibles solucións.
Ambas delegacións coincidiron en manter novas xuntanzas para deseñar actuacións conxuntas que permitan dinamizar o barrio, mellorar a oferta lúdica, cultural e xuvenil, asemade de incrementar a implicación da mocidade na toma de decisións
Esta primeira xuntanza enmárcase dentro da rolda de contactos que o Consello Comarcal de Esquerda Unida A Coruña está a desenvolver co tecido asociativo coruñés na procura de avanzares no proceso de participación cidadá que EU pretende promover. Por iso, a intención da nosa organización é manter este tipo de xuntanzas semanalmente durante tempo indefinido coa intención de acercar á veciñanza e aos movementos sociais á política coruñesa.
O Coordinador Comarcal de EU, César Santiso, valorou moi positivamente esta primeira reunión por considerala moi produtiva e indicou que o dialogo constante de Esquerda Unida coa veciñanza e os movementos sociais, será o sinal de identidade deste novo Consello Comarcal.
